Assalamu’alaikom haba lôn puphôn
Saleum ulon brie keu handai taulani
Nibak rakan lôn lake amphôn
Pat-pat na salah bak lôn meurawi
Haba peuingat bacut lôn peugah
Bek gadoh arah han meupat tawoe
Keu mahasiswa bek apôh apah
Mita jabatan ileumèe katuwoe
Göt that cilaka lagi lom keji
Yang pubuet maksiet sireuta luba
Meunan geupeugah wasiet di nabi
Ingat hai kawan bek sampe lupa
aneuk dum jinoe la-én that bagoe
peugöt peurangoe kalagèe raja
hana dipiké laba ngon rugoe
yang peunténg mangat ditakat saja
nacit yang dara jak keudeh keunoe
geuba le agam peu-ék bak Honda
meunan geupeugah le gurèe kamoe
lagèe murua meutipek bak rueng buya
ladôm di agam laen lom tabi’at
uroe diteungeut malam meujaga
hana dipikè untuk ibadat
mata dum teubleut bak nonton bola
nyan mahasiswa takalön jinoe
laen nibak nyan nyoe pat pih kana
Kajimeupaké sabe keudroe-droe
Kayèe bak jaroe jeut keu seunjata
alèh tan teuingat poma di gampông
ka apôh apah sajan ngon ayah
mita beulanja jeut keupeulindông
keu aneuk sanjông teungoh kuliah
teunaga abéh pikéran kacoe
adak udép susah hana dikira
geulakèe doa bak tuhan sidroe
meutuah aneuk jeut keu sarjana
aneuk di sinoe salah meulangkah
göt that peugöt droe ngon foya-foya
ladôm na beutoi ladôm na salah
meu’ah e ayah dua ngon poma
Oleh Rayhamizar
Ketua UKM PERS DETaK Unsyiah
